CERITA BAHASA BANJAR ISLAMI

Nabi Ibrahim Dicucul Api Oleh Kaumnya

Assalamu’alaikum wr. Wb

Nang ulun hurmati, bubuhan dewan juri, nang langkar langkar  lawan bungas

Nang ulun hurmati, buhuhan guru-guru, lawan kakawanan sabarataan, pukuknya baik nang tuha atawa nang anum. Baik nang dihujung, atawa nang dihadapan. Baik nang di sabalah kiwa, atawa nang di sabalah kanan.

Ulun, nang badiri dihadapan bubuhan pian ngini, ulun handak umpat bakisah.

Hakunlah pian, mandangarakan?

Kisah ulun ngini, bajudul “Nabi Ibrahim Dicucul Api Oleh Kaumnya”.

Kaini kisahnya nah.

Suatu hari, Nabi ibrahim waktu ngitu sedih banar, kanapa jadi sadih? karna selain kaumnya yang kada mau menerima dakwahnya, abah sidin sorang kada mau jua baiman lawan Allah swt. Tapi , Nabi Ibrahim tatap tabah lawan kuat mahadapi.

Lalu, nabi ibrahim befikir. Kayapa caranya supaya kaumnya tahu bahwa patung berhala nang disembah bubuhannya tu kadada manfaatnya jua lawan kadada baisi kakuatan jua.

Naah, Pas waktu ngitu, kota dimana Nabi Ibrahim badiam sunyi, lantaran bubuhannya tulakan keluar kota manggawi kabiasaan mereka merayakan hari raya di padang luas di luar kota.

Jar Nabi Ibrahmi baucap: naah, ngini pas banar nih. Kuhancur kam patung-patungai hari ini.

Limbah dilihat sidin, bubuhannya sudah tulakan sebarataan. Lalu sidin maambil  kapak ganal, tulak sidin ke tampat penyembahan berhala. Pas sampai disitu, baucap nabi ibrahim saurangan sing nyaringan, ei bubuhan berhala, makanan banyak ni nah, nyaman-nyaman pulang, kanapa kada dimakan? Siapa nang kawa bepandir disini, jawab!

Limbah itu, disepak-sepak sidin dulu berhala tu, imbah itu, hanyar sidin hancur pakai kapak. Imbah parak habis seberataan sudah, sidin sisai berhala nang paling ganal sebuting, sidin gantung kapak tadi di gulu berhala nang paling ganal itu.

Nahh, imbah bubuhannya bulikan, lalu abutai sakampungan melihat patung hancuran.

Abut bubuhannya mancarii, akhirnya bubuhan mamutusakan bahwa nabi Ibrahim jua nang mahancurakan, sualnya jar bubuhannya nabi ibrahim haja di kota ngini nang kada katuju lawan patung ngitu.

Lalu disidangai nabi ibrahim di tengah kota.

Jar bubuhannya batakun, Hai Ibrahim: ikam kalu nang mahancur berhala?

Jar nabi Ibrahim: naah, kada malihat lah bubuhan ikam? Nang manguti kapak ganal tu siapa? Nang mangutinya patung berhala nang paling ganal klo?

Tapi akhirnya, sidang mamutusakan bahwa nabi Ibrahim harus dibakar.

Pas hari H nya, bubuhannya mangumpulakan kayu bakar sing banyakan. Limbah ngitu, disalukut bubuhannya, limbah apinya pina ganal, lalu ditimbai bubuhannya nabi ibrahim ke dalam api itu.

Tapi, Nabi Ibrahim kada takutan, nabi ibrahim tawakal lawan Allah.

Laluai nabi ibrahim ditimbai ke dalam api, taaaaakkkkkkkk.

Pas Nabi Ibrahim ditimbai, Lalu Allah berfirman supaya api jadi dingin:

قُلْنَا يَانَارُ كُوْنِيْ بَرْدًا وَسَلَامًا عَلَى اِبْرَاهِيْمَ

Nang artinya: Kami berfirman: hai api, menjadi dinginlah, dan menjadi keselamatanlah bagi ibrahim.

Nabi Ibrahim pun kada marasa panas sama sakali, malah sidin kedinginan. Marasa kadinginan, lalu kaluarai sidin bajalan, santai ja sidin kaluar.

Naah, imbah malihat ngitu, lalu takajutan ai bubuhannya seberataan. Bah, jar bubuhannya, nangkaya ngini cara, bararti dasar bujur nabi Ibrahim ni.

Naah, lalu bubuhannya ragu lawan patung nang bubuhannya sambah. Imbah peristiwa ngitu, banyak nang menerima keimanan kepada Allah swt.

Nah, kaitu pang kisahnya.

Jadi, hikmah kisah nang taditu: apabila kita mandapat musibah atawa cubaan, hendaklah kita bersabar, tawakkal dan pasrahkan semuanya kepada Allah swt. Karena Allah swt. sanantiasa menolong hambanya.

Nah, sampai disini kisah ulun.

Mudahan bubuhan pia katuju.

Ulun tutup lawan pantun

Buah mangga rimbun di rapun

Gugur sabiji diatas hatap

Lawan nang tuha ulun minta ampun

Lawan nang anum ulun minta maaf

Assalamu’alaikum wr, wb.